News

29
Jan

Դաշնակցութիւնը Կանգնած Է Արցախի Կողքին. Մամլոյ Ասուլիս

ՀՅԴ Բիւրոյի նորընտիր ներկայացուցիչ Յակոբ Տէր Խաչատուրեան եւ ՀՅԴ Բիւրոյի նախագահ Արմէն Ռուստամեան Յունուար 29-ին տուին մամլոյ ասուլիս մը, որուն ընթացքին Յակոբ Տէր Խաչատուրեան նշեց, որ ՀՅԴ 33-րդ Ընդհանուր ժողովը աւարտեց իր աշխատանքները Ստեփանակերտի մէջ: «Նորընտիր Բիւրոն ունեցաւ ամենաբարձր մակարդակի հանդիպումներ Արցախի ղեկավարութեան հետ եւ, վերադառնալով Հայաստան, անմիջապէս նոյն տեսակի հանդիպումներ ունեցաւ Հայաստանի Հանրապետութեան նախագահի եւ վարչապետի հետ»,- տեղեկացուց ան:

Տէր Խաչատուրեան նշեց, որ հանդիպումներուն ընթացքին յայտնած են գործակցութեան պատրաստակամութիւն` ի շահ մեր հայրենիքին, երկու պետութիւններուն եւ ի խնդիր Հայ Դատին:

Արմէն Ռուստամեան` անդրադառնալով ՀՅԴ 33-րդ Ընդհանուր ժողովին, նշեց, որ ինչպէս ՀՅԴ բոլոր ժողովները, այնպէս ալ այս մէկը եղաւ բուռն ու բովանդակային: «Այս Ընդհանուր ժողովը ՀՅԴ-ն որոշեց իրականացնել Արցախի մէջ, որ ունի լուրջ խորհուրդ: Մենք կը կարծենք, որ հիմնական օրակարգային հարցը եղած եւ կը մնայ Արցախի հիմնախնդիրի հայանպաստ լուծումը»,- նշեց ան եւ շեշտեց, որ հայկական երկրորդ պետութեան մէջ Ընդհանուր ժողով կը գումարուէր առաջին անգամ, եւ ատիկա խորհրդանշական էր:

«Դաշնակցութիւնը իր համասփիւռ կառոյցով ներկայ է Արցախի մէջ, կանգնած է Արցախի կողքին` ի պաշտպանութիւն Հայ Դատի հանգրուանի: Բացի այդ` այս ժողովը եկաւ փարատելու բոլոր կասկածները, թէ իբր Դաշնակցութիւնը տարբեր շերտեր ունի, թէ իբր շարքերու եւ ղեկավարութեան միջեւ կան տարաձայնութիւններ: Բիւրոյի կազմի ընտրութիւնն ալ, որ տեղի ունեցաւ մէկ քուէարկութեամբ` 2/3-էն աւելի ձայներով, եկաւ փաստելու, որ ՀՅԴ-ն միակամ է եւ պատրաստ ստանձնելու մարտահրաւէրները, եւ այդ առաքելութիւնը ունի մեր կուսակցութիւնը»,- ըսաւ Ռուստամեան:

Նշենք, որ ՀՅԴ-ն 33-րդ Ընդհանուր ժողովէն ետք տարածած էր յայտարարութիւն, որուն մէջ կը նշուէր նաեւ, որ Հայաստանի եւ Արցախի միջեւ ռազմաքաղաքական դաշինքի մասին համաձայնագիրի` սեղմ ժամկէտներու մէջ կնքումը հրատապ անհրաժեշտութիւն է:

Հարցին, թէ ի՞նչ կ’ենթադրէ այդ ռազմաքաղաքական դաշինքը եւ ինչո՞ւ ճիշդ այսօր Դաշնակցութիւնը կը խօսի այդ մասին` ՀՅԴ Բիւրոյի նախագահ Արմէն Ռուսատմեան պատասխանեց, որ Դաշնակցութիւնը այդ հարցը շատոնց բարձրացուցած էր:

Ռուստամեանի համաձայն, առնուազն անոնք, որոնք քիչ մը երկար կենսագրութիւն ունին քաղաքական կեանքին մէջ, կը փաստեն, որ ռազմաքաղաքական դաշինքի հարցը Դաշնակցութիւնը շատոնց  բարձրացուցած էր, ատոր մասին խօսած են երեւի 10 տարիէն աւելի:

«Միշտ ատոր անհրաժեշտութիւնը կարեւոր համարած ենք: Ռազմաքաղաքական դաշինքը, ըստ էութեան, մէկ կողմէն` չի տկարացներ մեր դիրքերը բանակցային գործընթացին մէջ, միւս կողմէն` կ’արձանագրէ Հայաստանի եւ Արցախի անմիջական կապը: Այսինքն` այն ամէնը ինչ տէ ֆաքթօ ունինք, տէ իւրէ իրաւական դաշտ բերելու իրաւական հարցը պիտի լուծէ ռազմաքաղաքական դաշինքը: Այս խնդիրներու հետապնդման հետ կապուած ճշգրիտ քայլեր առած ենք: Եթէ յիշէք, ժամանակին դեռ նախագահական ընտրութիւններուն, երբ Վահան Յովհաննիսեան առաջադրած էր իր թեկնածութիւնը, խօսած էինք չյարձակելու մասին Ատրպէյճանի հետ ակտ կնքելու վերաբերեալ: Իսկ ապրիլեան պատերազմին հետեւանքներով՝ մեր առաջարկը ընդունեց իշխանութիւնը, յանձնարարութիւն տուաւ ԱԳՆ-ին, որ պատրաստէ փաստաթուղթ»,- ըսաւ Ռուստամեան` աւելցնելով, որ այդ ամբողջ աշխատանքներուն մէջ Դաշնակցութիւնը միշտ ներգրաւուած եղած է:

Ռուստամեանի հաւաստիացումով` ՀՅԴ-ն ունի իր պատկերացումները, թէ ինչպէս պէտք է ըլլայ այդ ռազմաքաղաքական դաշինքը, եւ կը կարծեն, որ այսօր ալ իսկապէս ռազմաքաղաքական դաշինքի կնքումը անհրաժեշտութիւն է, աւելին` այդ անհրաժեշտութիւնը շատոնց հասունցած էր: «Այսօր ունինք լուրջ սպառնալիքներ Արցախի անվտանգութեան հետ կապուած` նոր պատերազմ հրահրելու Ատրպէյճանի մտադրութիւններուն առումով: Պէտք է յստակ արձանագրենք, որ յարձակում Արցախի վրայ, կը նշանակէ` յարձակում Հայաստանի վրայ: Մեր միասնական անվտանգութեան համակարգին վերաբերեալ մենք մատնանշումներ ըրած ենք նախորդ բոլոր համագործակցութեան պայմանագրերուն մէջ: Այսինքն` բացարձակապէս անհիմն են, եւ ես բացատրութիւն չեմ տեսներ այն յայտարարութիւններուն մէջ, թէ Դաշնակցութիւնը նոր կը յիշէ ասոր մասին: Հաւանաբար ուղղակի ոմանց պէտք է այդպէս ներկայացնել»,- ըսաւ Արմէն Ռուստամեան:

Ան նշեց նաեւ, որ ռազմաքաղաքական դաշինքի կնքումը ՀՅԴ-ի հետեւողական մօտեցումը եղած է եւ այսօր ալ ատոր մասին կը խօսին` զայն գործնական դարձնելու համար: ՀՅԴ Բիւրոյի նախագահին համաձայն, ռազմաքաղաքական դաշինքի կնքման վերաբերեալ Դաշնակցութիւնը արդէն իսկ հանդիպած ու զրուցած է ինչպէս Արցախի նախագահի, այնպէս ալ Հայաստանի Հանրապետութեան վարչապետի հետ. «Կը կարծենք, որ պէտք է այդ դաշինքի կնքման` ճիշդ համաձայնեցուած քայլերը պայմանաւորենք, ճանապարհային քարտէզ մշակենք ու դիմենք անոր կնքման: Կը կարծեմ` ասիկա պէտք է դառնայ մեր համաժողովրդական պահանջը` արցախահայութեան, Հայաստանի եւ Սփիւռքի, որպէսզի մենք միասին արձանագրենք մեր միակամութիւնը` պաշտպանել մեր համահայկական շահերը` Արցախն ու Հայաստանը միասին վերցուած»:

ՀՅԴ Բիւրոյի նորընտիր ներկայացուցիչ Յակոբ Տէր Խաչատուրեան նշած է, որ Հայաստանի եւ Արցախի միջեւ ռազմաքաղաքական դաշինքի կնքման մասին Դաշնակցութեան համաժողովն ալ յստակօրէն արտայայտուեցաւ` որդեգրելով նախկին մօտեցումները:

«Համաժողովը անհրաժեշտ գտաւ, որ ապրիլեան քառօրեայէն ետք եւ ներկայ իրավիճակէն մեկնելով` մենք պէտք է պատրաստ ըլլանք պատերազմական գործողութիւններու որեւէ ժամանակ սկսելուն: Ռազմաքաղաքական դաշինքը իրաւական հարթութեան վրայ կը բերէ Արցախի անվտանգութեան հարցին մէջ Հայաստանի դերակատարութիւնը»,- ըսաւ Տէր Խաչատուրեան:

 

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...