News

22
Apr

Լիաբուռն Մասնակցինք Արցախի Զօրակցութեան Հանգանակութեան

Artsakh

Ինչպէս ծանօթ է, Մեծի Տանն Կիլիկիոյ Ս. Աթոռի գահակալ Արամ Ա. կաթողիկոս, Ապրիլ 11-15 այցելեց Հայաստան եւ Արցախ, Ամենայն Հայոց կաթողիկոս Գարեգին Բ. վեհափառ հայրապետին հետ միասնաբար զօրակցութիւն յայտնելու համար հայրենի պետութեան, Արցախի պետական պատասխանատուներուն, սահմանապահ մեր զինուորներուն ու քաջարի մեր ժողովուրդին: Այցելութեան աւարտին, վեհափառ հայրապետը Մեծի Տանն Կիլիկիոյ կաթողիկոսութեան ու թեմերուն անունով 500,000 տոլարի անմիջական օժանդակութիւն մը կատարեց Արցախին, որ Ապրիլի առաջին օրերուն տեղի ունեցած ատրպէյճանական թշնամական յարձակումներուն հետեւանքով ունեցաւ մարդկային զոհեր ու նիւթական մեծ վնասներ: Նոյնքա՛ն գումար մը տրամադրեց նաեւ Ամենայն Հայոց կաթողիկոսը՝ Ս. Էջմիածինի ու թեմերուն անունով:

Ընդառաջելով Արամ Ա. վեհափառ հայրապետի կոչին, այսու, յանուն թեմիս Կրօնական ժողովին ու Ազգային վարչութեան՝ կը հրաւիրենք մեր ժողովուրդը լիաբուռն մասնակցութիւն բերելու Արցախի ի նպաստ հանգանակութեան, իբրեւ զօրակցութիւն պետութեան, բանակին եւ մասնաւորաբար սահմանային գօտիի բնակիչներուն ու նահատակներու ընտանիքներուն:

Մեր թեմի զաւակները մի՛շտ սիրայօժար պատրաստակամութեամբ ընդառաջած են հայրենանուէր նման նախաձեռնութիւններու. վկան՝ Հայաստան Համահայկական հիմնադրամի տարեկան թելեթոնները, Սուրիոյ հայութեան ի նպաստ վերջին չորս տարիներու հանգանակութիւններն ու Փետրուար 21, 2016ի թելեթոնը:

Երբ մեր սահմանապահ ուժերը իրենց կեանքը չեն զլանար հայրենիքի պաշտպանութեան համար եւ երբ մեր ժողովուրդը ոգի ի բռին կառչած կը մնայ դարաւոր հայրենիքին, վեհափառ հայրապետին կոչը ազնիւ մարտահրաւէր կ՛ըլլայ բոլորիս, որպէսզի գործնապէս մասնակից ըլլանք Արցախի պահպանումին, մանաւանդ որ Ատրպէյճանի դաշնակից ցեղասպան թուրքին դէմ մեր պահանջատիրական պայքարը թեւակոխած է կենսաւորման նոր փուլ մը:

Եկէ՛ք, ուրեմն, գործնապէս ընդառաջենք Արցախի կանչին: Ձեր նուիրատուութիւնները կրնաք կատարել ուղղակիօրէն Ազգային առաջնորդարանին (Western Prelacy – Memo: Artsakh Support Fund), կամ՝ թեմիս ձեր շրջանի եկեղեցիներուն միջոցաւ։

Թող օրհնեալ ըլլայ յիշատակը մեր նահատակներուն ու զոհերուն, մխիթարութիւն՝ անոնց ընտանիքներուն, անսպառ կորով՝ մեր քաջարի բանակին եւ ապահով ու խաղաղ կեանք՝ մեր ժողովուրդին:

Փա՜ռք մեր սուրբ նահատակներուն:

Յաւե՜րժ ապրի մեր ժողովուրդը, ի Հայաստան,  յԱրցախ եւ ի սփիւռս աշխարհի:

ՄՈՒՇԵՂ ԱՐՔ. ՄԱՐՏԻՐՈՍԵԱՆ, ԱՌԱՋՆՈՐԴ

ԱՄ Նահանգներու

Արեւմտեան Թեմի

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...