News

21
May

Կարօ Փայլան Պիտի Մասնակցի Թուրքիոյ Խորհրդարանական Ընտրութիւններուն

GaroPaylan

Թուրքիոյ խորհրդարանի հայ պատգամաւոր Կարօ Փայլան Յունիս 24-ին կայանալիք խորհրդարանական ընտրութիւններուն կրկին պիտի առաջադրուի քրտամէտ Ժողովուրդներու ժողովրդավարական կուսակցութեան կողմէ: Ինչպէս կը հաղորդէ «Արմենփրես»-ը, թրքական Mezopotamya Ajansı գործակալութիւնը կը յայտնէ, որ Փայլան կրկին ներառուած է քրտամէտ կուսակցութեան թեկնածուներու ցուցակին մէջ:

Ի տարբերութիւն, սակայն, 2015 թուականի խորհրդարանական ընտրութիւններուն, երբ Փայլան առաջադրուած էր Պոլիսէն, այս անգամ անոր թեկնածութիւնը պիտի առաջադրուի Տիարպեքիրի մէջ:

Կարօ Փայլան պատգամաւոր ընտրուելէ ետք յայտնի դարձաւ Թուրքիոյ խորհրդարանին մէջ  ունեցած իր համարձակ ելոյթներով: Անոնցմով ան բազմաթիւ անգամներ բարձրաձայնած է Հայոց ցեղասպանութեան հարցը` կոչ ընելով իշխանութիւններուն առերեսուելու սեփական պատմութեանն ու ընդունելու սեփական յանցանքը: Պատգամաւորը նոյնիսկ համապատասխան առաջարկ ներկայացուցած էր, որով կը նախատեսուէր 1915 թուականի դէպքերը պաշտօնապէս ճանչնալ որպէս ցեղասպանութիւն: Առաջարկը, սակայն, մերժուած էր: Ան նաեւ պարբերաբար բարձրաձայնած է պոլսահայ համայնքին յուզող հարցերը, մասնաւորապէս Պոլսոյ Հայոց պատրիարք ընտրելու անհրաժեշտութեան հարցը:

Խորհրդարանի ամպիոնէն ցեղասպանութեան մասին խօսելու համար ան նոյնիսկ ենթարկուած է կարգապահական տոյժի: Բացի այդ, օրերս յայտնի դարձաւ, որ անոր դէմ քրէական օրէնսգիրքի տխրահռչակ 301-րդ յօդուածով հետաքննութիւն սկսած է: Հետաքննութեան ծիրէն ներս կազմուած է անոր անձեռնմխելիութենէ զրկելու պահանջագիր:

Նախորդ` 2015 թուականի Նոյեմբերին տեղի ունեցած խորհրդարանական ընտրութիւններու արդիւնքով թրքական խորհրդարանը ունէր 3 հայ պատգամաւոր` Կարօ Փայլանը, քեմալական Հանրապետական ժողովրդական կուսակցութեան կողմէ առաջադրուած իրաւաբան Սելինա Տողանը եւ իշխող «Արդարութիւն եւ զարգացում» կուսակցութեան կողմէ առաջադրուած հայ լրագրող Մարգար Եսայեանը:

Յունիս 24-ի ընտրութիւններուն ընդառաջ Հանրապետական ժողովրդական կուսակցութիւնը հրապարակած էր իր թեկնածուներու ցուցակը, ուր չկայ Սելինա Տողանի անունը:

Իսկ Մարգար Եսայեանի առաջադրման մասին  յայտնի պիտի ըլլայ, երբ իշխող կուսակցութեան կողմէ ցուցակները հրապարակուին:

Թուրքիոյ մէջ Յունիս 24-ին տեղի պիտի ունենան արտահերթ նախագահական ու խորհրդարանական ընտրութիւններ: Ընտրութիւններէն ետք երկրի մէջ կառավարման խորհրդարանական համակարգէն պիտի անցին նախագահական համակարգի: Նոր խորհրդարանը պիտի ունենայ 600 պատգամաւորներ, նախկին 550-ի փոխարէն։

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...