News

07
Mar

Կիներու Միջազգային Օրուան Հանդիսաւոր Նշում Լիբանանի Մէջ

lokh-2_3617

Հովանաւորութեամբ ԼՕԽ-ի Շրջանային վարչութեան եւ կազմակերպութեամբ ԼՕԽ-ի Շրջանային վարչութեան դաստիարակչական յանձնախումբին, երէկ` Երկուշաբթի, 6 Մարտ 2017-ի առաւօտեան ժամը 10:30-ին, ԼՕԽ-ի «Արաքսի Պուլղուրճեան» ընկերաբժշկական կեդրոնի «Թնճուկեան» սրահին մէջ արժանավայել կերպով նշուեցաւ Կիներու միջազգային օրը: Այս մասին կը հաղորդէ Լիբանանի «Ազդակ» օրաթերթը։

Լիբանանեան եւ ՀՕՄ-ի քայլերգներու ունկնդրութենէն ետք, կազմակերպիչ յանձնախումբի ատենապետ Ազատ Սարգիսեան ողջունեց ներկաները եւ անդրադարձաւ օրուան յայտագիրին ու անոր իմաստին: Կիներու պահանջատիրական շարժման գլխաւոր թուականներու հակիրճ թուումէն ետք, ան ընդգծեց, որ Հայաստանի Ա. Հանրապետութիւնը 1918-ին առաջին պետութիւնն էր, որ կին դեսպան ունեցաւ յանձին Տիանա Աբգարի: «Չմոռնանք մեր պատմութեան «փափկասուն տիկնայք»-ը եւ այժմու բազմատեսակ մարտահրաւէրներով ներգրաւենք հայ երիտասարդութիւնը», շեշտեց Ազատ Սարգիսեան:

Ապա ան բեմ հրաւիրեց օրուան բանախօսը Սիլվա Փափազեանը:

Համալսարանական դասախօս, կնոջական եւ առհասարակ հայ ազգային-հասարակական կեանքին մօտէն հետեւող Սիլվա Փափազեան, հանգամանօրէն անդրադարձաւ Կիներու միջազգային օրուան խորհուրդին: Պատմական հակիրճ ակնարկով ան թուեց կնոջական շարժման ջատագով միջազգային կազմակերպութեանց հանգրուանային իրագործումները: «Այսուհանդերձ կիներու իրաւունքները լրիւ կերպով չեն իրագործուած», դիտել տուաւ ան: Ան գոհունակութեամբ իբրեւ օրինակ յիշեց վերջերս Պուրճ Համուտի քաղաքապետութեան կողմէ կին ոստիկաններու նշանակումը: Ան նաեւ անդրադարձաւ կիներու իրաւունքներու ձեռքբերման պայքարի մարզին մէջ կարեւոր ներդրում ունեցած հայուհիներու, ինչպէս` Սրբուհի Տիւսափ, Զապէլ Ասատուր, Զապէլ Եսայեան, Սիրան Սեզա, Արփիկ Միսաքեան եւ այլն: Փափազեան այս առիթով մէջբերեց Թուրքիոյ խորհրդարանի հայ կին երեսփոխան Սելինա Տողանի շնորհաւորական ուղերձը Աւստրալիոյ Նիւ Սաութ Ուէյլզ նահանգի նորընտիր վարչապետ Կլատիս Պերեճիքլեանին, ուր Տողան բարձր գնահատելով հայուհիին դերը, կ՛ընդգծէր. «Մենք իբրեւ հայ կին, ստիպուած ենք պաշտպանելու սեռերու հարցը եւ ըլլալու ուժեղ Զապէլ Եսայեանի պէս»:

Փափազեան հինգ գլխաւոր կէտերու մէջ թուեց կիներու արժէքները` մեկնաբանելով իւրաքանչիւրին իմաստը.

– Արդարութիւն
– Արժանապատուութիւն
– Հաւասարութիւն
– Գնահատանք
– Յարգանք

Ապա իր սրտին խօսքը ուղղեց Մեծի Տանն Կիլիկիոյ կաթողիկոսութեան միաբան Թորգոմ Ծ. վրդ. Տօնոյեան, որ նախ պատմական ակնարկով անդրադարձաւ կնոջ մասին նշուած դերին ու վարկին Աստուածաշունչին մէջ` յիշատակելով Եսթեր թագուհին, որուն դատողութեան յանձնուած էր ամբողջ ժողովուրդի մը ճակատագիրը: Ան նաեւ անդրադարձաւ հայոց պատմութեան մէջ արժանաւոր հայ կիներու, ինչպէս` Կիլիկիոյ Զապէլ Թագուհին: Հայր սուրբը բաղդատական եզրեր դրաւ կնոջ եւ հա՛յ կնոջ միջեւ` նշելով, որ իբրեւ զաւակ մեր մայրերուն մօտ կ՛ուզենք տեսնել մայրութիւնը, աւելի քան կինը: Թորգոմ Ծ. վրդ. Տօնոյեան իբրեւ զաւակ, եղբայր եւ այր մարդ շնորհաւորեց հայ կինը` բարձր գնահատելով հայուհիին դերը եկեղեցւոյ  եւ առհասարակ մեր կեանքին մէջ` «լաւ որ կաք» ըսելով: Հայր սուրբը մեծապէս դրուատեց հայ կինը, «որուն ներդրումով մեր կեանքը կը պայծառանայ եւ մեր ազգը աւելի կը զօրանայ»: Նմանապէս, ան բարձր գնահատեց հայուհիին դերը յատկապէս ԼՕԽ-ի ընդմէջէն: «Երեւակայեցէք մեր կեանքը, եթէ ԼՕԽ-ը չըլլար», ըսաւ ան: «Հիմա Պահքի ժամանակաշրջանն է, եւ իրենց ինքնընծայումով , ԼՕԽ-ականներ իրենց կեանքը տրամադրած են վասն հայութեան, անոնց սիրտերը, միտքերն ու սեղանները միշտ բաց են եւ պատրաստ օգնելու, ծաղկուն ու ծաղկազարդ», շեշտեց հայր սուրբը: «Կինը աւելի ուժեղ է, կրնայ շինել եւ քանդե՛լ տունը, դուք շինո՛ղ եղէք», եզրափակեց հայր սուրբը:

Ապա ներկաները հրաւիրուեցան  Տէրունական աղօթքը կատարելու, որմէ ետք հայր սուրբը պահպանիչով փակեց ձեռնարկը:

Այս առիթով ներկայացուեցաւ գեղարուեստական յայտագիր, որուն ընթացքին ջութակի վրայ ելոյթ ունեցաւ հայրենի արուեստագէտ ջութակահար Յովիկ Գարախանեան, իսկ շուիով ելոյթ ունեցաւ լիբանանահայ ծանօթ արուեստագէտ Յակոբ Քելուկեան: Սակայն օրուան անակնկալը հայրենի մեցցօ սոփրանօ Քլարա Ալիխանեանն էր, որ իր դիւթիչ ձայնով հմայեց ներկաները, որոնք չդիմանալով պահու քաղցրութեան` ինքնաբուխ ձայնակցեցան անոր «Կիլիկիոյ» քայլերգի մեներգին: Հայրենի երգչուհին այս առիթով սրտաբուխ կերպով յայտագիրէն դուրս մեներգեց նաեւ Կոմիտասի «Կռունկ»-ը դարձեալ հմայելով ներկաները:

Այս առիթով ներկաներուն ցրուեցաւ «Հայ կինը մայր եւ հասարակական գործիչ» խորագրեալ Ռիմա Պօղոսեանի յօդուածէն հատուած մը:

Աւարտին ներկաներուն մատուցուեցան յատուկ յուշանուէրներ եւ հիւրասիրութիւն:

 

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...