News

28
Feb

Համազգային Թատրոնը կը Յայտարարէ, որ կը Շարունակէ Գործել Անկախ Թատրոնի Լուծարման Մասին Տարածուած Լուրերուն

Սօս Սարգսեանի անուան համազգային թատրոնը յառաջիկային թատերասէրներու դատին պիտի յանձնէ նոր ներկայացումներ, թատրոնը պիտի մեկնի հիւրախաղերու, պիտի մասնակցի փառատօներու. Անիկա պիտի չդադրեցնէ իր գործունէութիւնը՝ անկախ թատրոնի լուծարման մասին տարածուող լուրերուն:

Ըստ Armenpress.am-ի, այս մասին, Փետրուար 28-ին, լրագրողներու հետ հանդիպման մը ընթացքին, յայտնեցին թատրոնի ներկայացուցիչները` շեշտելով, որ թատրոնի լուծարման մասին իւրաքանչիւր յայտարարութիւն պիտի բախի հասարակութեան եւ մասնաւորապէս մտաւորականութեան դիմադրութեան ու մերժման:

«Համազգային թատրոնի մէջ կ՝աշխատին դերասաններ, որոնք պահանջուած են ո՛չ միայն Հայաստանի մէջ, այլեւ՝ երկրի սահմաններէն դուրս: Այստեղ կը բեմադրուին ներկայացումներ, որոնք տարուան ընթացքին մէկ կամ երկու անգամ «Գրան պրի»ներով կը վերադառնան տարբեր արտասահմանեան փառատօներէն: Համազգային թատրոնը այսօր կը գտնուի վերելքի փուլի մէջ եւ թատրոնի լուծարման մասին յայտարարութիւններ ընելը պարզապէս անթոյլատրելի են»,- նշեց թատրոնի տնօրէնի ժամանակաւոր պաշտօնակատար Արման Նաւասարդեան եւ աւելցուց, որ շուրջ երկու ամսուան ընթացքին վերանորոգած են թատրոնի ճեմասրահը, բեմական յարդարանքը, բեմադրած են նոր ներկայացում:

Անդրադառնալով ՀՀ մշակոյթի նախարարի պարտականութիւնները կատարող Նազէնի Ղարիբեանի յայտարարութեան, թէ Համազգային թատրոնը հիմնուած է Սօս Սարգսեանի լսարանի հիմքին վրայ, դերասանական կազմը եղած է մէկ լսարանէ` թատրոնի տնօրէն Արման Նաւասարդեան ըսաւ, որ Համազգային թատրոնը հիմնուած է 1991-ին, երբ Սօս Սարգսեանը Երեւանի թատրոնի եւ շարժանկարի պետական ուսումնարանին մէջ լսարան չ՝ունէր: «Թատրոնը հիմնադրած է Սօս Սարգսեանը իր համախոհներ Դաւիթ Յակոբեանի, Կարինէ Ջանջուղազեանի, Գալիա Նովենցի, Կարէն Ջանիբեկեանի, Մայիս Գարակէոզեանի եւ այլ նուիրեալներու հետ, որոնցմէ ոչ ոք եղած է Սարգսեանի ուսանողը: Անոնցմէ իւրաքանչիւրը մեծ աւանդ ունի Հայաստանի թատերական կեանքի կայացման գործին մէջ»,- ընդգծեց ան:

Նաւասարդեան շեշտեց, որ իրենք պետութենէն գումար չեն խնդրեր բեմադրութիւններու համար, ունին արտապիւտճէ եւ տոմսերու վաճառքէն գոյացած գումարներով կը հոգան նոր ներկայացումներ բեմադրելու հարցը: «Թատրոնը կարելի չէ զրկել այն միջոցներէն, որոնք մեզի կը տրամադրէ պետութիւնը աշխատավարձներու համար: Առանց ատոր թատրոնը չի կրնար աշխատիլ»,- ըսաւ թատրոնի տնօրէնի ժամանակաւոր պաշտօնակատարը:

Ան շեշտեց, որ Սօս Սարգսեանի անուան համազգային թատրոնը պարտադիր պէտք է ըլլայ պետական, քանի որ Սօս Սարգսեանը քիչ բան չէ ըրած հայոց պետականութեան համար: «Իննսունականներու պատերազմի օրերուն, երբ շատ թատրոններ չէին կրնար վարձատրել դերասանները, Սարգսեանը հիմնեց այս թատրոնը, ուր բեմադրուած են եզակի ներկայացումներ, որոնք թատերասէր հասարակութիւնը մինչ օրս կը յիշէ»,- նշեց Նաւասարդեան ու կոչ ըրաւ պետական այրերուն՝ լաւ ուսումնասիրելու գործող  թատրոններն ու մշակութային այլ կառոյցները՝ նախքան որեւէ որոշում կայացնելը:

Թատրոնի բեմադրիչ, դերասան Դաւիթ Յակոբեանի խօսքով` ՀՀ կառավարութիւնը բոլոր նախարարութիւններուն յանձնարարական տուած է գտնելու ճանապարհներ հաստիքներու կրճատման համար: «Ատիկա բնական է, բայց կը լուծարեն այն հաստատութիւները, որոնք ոչինչով կը զբաղին, ուր գումար կը մսխուի: Լուծարել թռիչքի մէջ գտնուող, ապրող կառոյցը նման է անոր, որ բժիշկը դիտաւորեալ կտրէ առողջ մարդու թոքը»,- ընդգծեց Յակոբեանը:

Համազգայինի գեղարուեստական ղեկավար Նարինէ Գրիգորեանի կարծիքով` թատրոնը պատմութիւն ունենալէ բացի, նաեւ ներկայ ունի ու կը ծաւալէ աշխոյժ գործունէութիւն: «Մեր թատրոնի համար նախատեսուած շէնքը կը կառուցուի, ունինք եօթը առաջնախաղ, կ՝իրականացնենք ժամանակակից դրամատուրգիայի թատերականացուած ընթերցանութիւններ, ունինք հիւրախաղեր, պիտի մասնակցինք փառատօներու: Այսպիսի աշխոյժ վերելքի մէջ թատրոնի լուծարման մասին խօսիլը յանցանք է: Կ՝ուզեմ շնորհակալութիւն յայտնել մեր թատրոնի հանդիսատեսին` մարդոց, որոնք համացանցով ապստամբութիւն սկսած են. ի վերջոյ հանդիսատեսն է որոշողը փակե՞լ թատրոնը, թէ՝ ո՛չ»,-եզրափակեց Գրիգորեանը:

 

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...