News

21
May

Հայաստանը Դարձնել Պետութիւն, Որ Կը Ծառայէ Հայութեան Ներուժի Պահպանման եւ Անոր Բնականոն Զարգացման․ Նիկոլ Փաշինեան

pashinyan_usc.thumb

Հայաստանի մէջ սկսած գործըթացը համահայկական բնոյթ ունի․ «Սիվիլնէթ»ի փոխանցմամբ՝ յայտարարեց ՀՀ վարչապետ Նիկոլ Փաշինեան, որ տեսակապի միջոցով երէկ մասնակցեցաւ Հարաւային Քալիֆորնիոյ համալսարանի Հայագիտութեան հիմնարկի մէջ կայացած «Հայաստանը վաղը․ քաղաքացիական դիւանագիտութիւնը` գործողութեան մէջ» խորագիրով քննարկման ժամանակ:

Փաշինեան իր ելոյթը սկսաւ` նշելով, որ վերջին մէկ ասմուան ընթացքին հանդիպած է հայերու աշխարհի տարբեր երկիրներէ, եւ կրնայ ըսել, որ անոնք «նոյնքան մաս կը կազմեն այս գործընթացին, որքան Հայաստանի մէջ բնակողները»:

«Ես ասիկա կը նշեմ` ընդգծելու այս գործըթացի համահայկական բնոյթը»,- ըսաւ վարչապետը: Անոր խօսքով` սկսածը իրեն համար առաջին հերթին «հայկական պետականութեան իմաստն ու նշանակութիւնը ճշգրտելու գործընթաց է»:

«Շատ երկար ժամանակ ինծի եւ շատերուն մէկ հարց կը տանջէր` ի վերջոյ ինչո՞ւ պէտք է գոյութիւն ունենայ Հայաստանի Հանրապետութիւնը»,- հարցադրում ըրաւ ան եւ վկայակոչեց ՀՀ Սահմանադրութեան նախաբանը, ուր նշուած է` որպէս հայկական պետութեան հիմնադիր հանդէս կու գայ ժողովուրդը:

«Ոչ թէ ՀՀ քաղաքացիները, ոչ թէ սովետական Հայաստանի քաղաքացիները, այլ հայ ժողովուրդը հանդէս կու գայ որպէս Հայաստանի Հանրապետութեան հիմնադիր»,- շարունակեց ան` աւելցնելով, որ հայկական պետութեան գոյութեան իմաստը իրեն համար նոյն այս «հիմնաքարային փաստն է»:

«Ես կը համարեմ, որ ՀՀ գոյութան իմաստը հետեւեալն է` հայութեան տնտեսական, ֆինանասկան, գիտական ներուժը կամ անոր զգալի մասը իր տարածքին մէջ կեդրոնացնելը եւ այդ ներուժի անվտանգութիւնը եւ բնականոն զարգացումը ապահովելը»,- ըսաւ Փաշինեան:

Հայաստանը դարձնել պետութիւն, որ կը ծառայէ հայութեան ներուժի պահպանման և անոր բնականոն զարգացման

Վարչապետը շեշտեց, որ նոր իշխանութեան խնդիրն է` մեր ժողովուրդի «արտագաղթի հազարամեայ անիւը կանգնեցնել եւ ետ պտտել», «Հայաստանը դարձնել պետութիւն, որ կը ծառայէ հայութեան ներուժի պահպանման եւ անոր բնականոն զարգացման»:

Ասոր համար, ըստ Փաշինեանի, մէկ կարեւոր նախապայման կայ` Հայաստանի Հանրապետութեան մէջ քաղաքացին «իրապէս պէտք է ըլլայ բարձրագոյն իշխանութիւն»:

«ՀՀ քաղաքաքին պէտք է որոշէ, թէ ով ըլլայ իր իշխանութիւնը եւ ով պէտք է դադրի իշխանութիւն ըլլալէ»,- ըսաւ ան` աւելցնելով, որ սա է քաղաքական այս գործընթացի ամենակարեւոր նպատակը եւ առանձնայատկութիւնը, որ, սակայն, «ամբողջական ծրագիր չէ Հայաստանի ապագայի մասին»:

«Պարոն վարչապետ, Դուք բոլորէն լաւ գիտէք, որ Հայաստանի եւ Սփիւռքի մէջ ակնկալիքները չափազանց շատ են: Եւ բոլորը` քաղաքացի կամ ոչ, պիտի ձգտին հասկնալու Ձեր գերակայութիւնները եւ այն ուղին, որով մտադիր էք շարժուելու առաջ: Կ’օգնէ՞ք մեզի հասկնալ ատիկա»,- վարչապետին հարց ուղղեց Հարաւային Քալիֆորնիոյ համալսարանի Հայագիտութեան հիմնարկի տնօրէն Սալբի Ղազարեան:

Ի պատասխան` Փաշինեան յիշեցուց` Հայաստանի` «սխալ ճանապարհով երթալու գործընթացը» սկսած է այն պահէն, երբ սկսած են կեղծուիլ ընտրութիւնները․ «Մեզի համար առաջնահերթութիւն է հաստատել ազատ, արդար, ժողովրդավարական ընտրութիւններու հիմնարկ, որպէսզի որեւէ ընտրութեան արդիւնք կասկածի տակ չդրուի ոեւէ մէկուն կողմէ»:

Միեւնոյն ժամանակ, ըստ Փաշինեանի, ազատ, արդար ընտրութիւններով մարդիկ կրնան ոչ միայն ինչ-որ քաղաքական ուժ բերել իշխանութեան, այլ նաեւ ազատ, արդար ընտրութիւններով այդ ուժը հեռացնել իշխանութենէն:

«Ինչո՞ւ ես այս հարցին առաւելութիւն կու տամ: Որովհետեւ մեր ճգնաժամը սկսած եւ խորացած է ընտրութիւններու արդիւնքները կեղծելու արատաւոր սովորութեան ներդրումէն եւ, անկեղծ ըսեմ, սա ես կը համարեմ մեր կառավարութեան ամենակարեւոր առաջնահերթութիւնը` դառնալ ժողովուրդի օրինական իշխանութեան երաշխաւորը»,- յայտարարեց ՀՀ կառավարութեան ղեկավարը:

Իսկական քաղաքացիական եւ ազգային զարթօնք է

Սալբի Ղազարեանի հարցումին, թէ ինչպէ՞ս պիտի պահպանուի քաղաքացիի ներգրաւուածութիւնը ընտրութենէ ընտրութիւն եղած ժամանակահատուածին մէջ ինչպէս Հայաստանի, այնպէս ալ Սփիւռքի մէջ, Նիկոլ Փաշինեան պատասխանեց, որ վերոնշեալ փոփոխութիւններէն ետք քաղաքացիներու ներգրաւուածութիւնը ապահովելու խնդիր իշխանութիւնները չունին, քանի որ հիմա «իսկական քաղաքացիական եւ ազգային զարթօնք է», եւ ատոր  էութիւնը հետեւեալն է` «որ իւրաքանչիւր քաղաքացի պայքարի իր իրաւունքի համար»:

ՀՀ վարչապետը որպէս կառավարման գործին մէջ Սփիւռքի ներուժը առաւելագոյն օգտագործելու խոչընդոտ նշեց սահմանադրական այն դրոյթը, որու համաձայն`  «օրինակ, նախարար կրնայ նշանակուիլ այն մարդը, որ վերջին չորս տարուան մէջ հանդիսացած է միայն ՀՀ քաղաքացի եւ վերջին չորս տարին մշտապէս բնակուած է Հայաստանի մէջ»:

«Այս կարգաւորումը չ՛արտայայտեր մեր ազգային ձգտումները եւ կը կարծենք, որ այս սահմանափակումը կը ստեղծէ արհեստական խոչընդոտներ Սփուռքի ներգրաւուածութեան համար: Մենք մտադիր ենք վերցնել այս արգելքները, որպէսզի Սփիւռքի ներուժը հնարաւորութիւն ունենանք օգտագործել պետական կառավարման գործին»,- ըսած է կառավարութեան ղեկավարը:

Ելոյթի աւարտին դահլիճի մէջ հաւաքուածները Փաշինեանը ողջունեցին բուռն ծափահարութիւններով: Ան շնորհակալութիւն յայտնեց եւ խոստացաւ յառաջիկային հանդիպիլ եւ աւելի մանրամասն քննարկել բոլոր հարցերը:

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...