News

05
Jun

ՀՀ Կրթութեան եւ Գիտութեան Նախարար՝ Յարգարժան Պրն. Արայիկ Յարութիւնեանին

mesrob-mashdotz

Յարգելի Նախարար,

Հայաստանի Հանրապետութիւնը թեւակոխած է նոր շրջան՝ շնորհիւ ժողովուրդի թաւշեայ յեղափոխութեան՝ Նոր Հայաստանի տեսլականով։

Այս գործընթացը ամբողջական դարձնելու հիմնական կէտերէն մէկը Կրթութեան նախարարութեան ոլորտին մէջ է. Ազգային գաղափարախօսութեան վրայ հիմնուած պետութիւն կերտելու նախապայմաններէն մէկն է հայոց լեզուի անարատութիւնը, որ պէտք է իրականացնել պետական մակարդակով, որպէսզի ընդգրկէ ե՛ւ լրատուական դաշտը ե՛ւ դպրոցները (յատկապէս դպրոցական գիրքերը)։ Ասիկա կը վերաբերի բոլոր այն օտար բառերուն, որոնք ձեւով մը ժառանգած ենք Սովետական ժամանակներէն եւ ինչու ոչ նաեւ օտար ազգերէ։

Հայոց լեզուն այն հազուագիւտ լեզուներէն է, որ իւրաքանչիւր դարձուածքի ու առարկայի համար ունի բազմաթիւ հոմանիշներ, իսկ Հայաստանի Հանրապետութեան տարածքին օգտագործուած օտար բառերը՝ անմիջապէս կը գրաւեն Սփիւռքէն եկողներուն ուշադրութիւնը, որոնք զարմանքով կը մօտենան հարցին. Ապրիլ Հայաստանի մէջ եւ լեզուն անաղարտ չպահել իսկապէ՛ս զարմանալի է, օրինակ՝ ինչո՞ւ ըսել սոցիալական, եթէ կարելի է ըսել հասարակական, ընկերային, ինչո՞ւ ըսել էքսքուրսեա, եթէ կարելի է ըսել զբօսանք, պտոյտ, ինչո՞ւ ըսել ֆակուլտետ, եթէ կարելի է ըսել բաժանմունք, ինչո՞ւ ըսել պոմիտոր եւ պատրճան, եթէ ունինք այնքան գեղեցիկ հնչող լոլիկ եւ սմբուկ բառերը։

Շարքը երկար է, ու շատ քիչ ջանք խլող աշխատանքով մը՝ կարելի է ամբողջութեամբ մաքրագործել լեզուն, որպէսզի անոր յաջորդէ այլ կարեւոր խնդիր մը՝ Մեսրոպեան ուղղագրութեան վերականգնումը, որ կրնայ մեծ դեր ունենալ Սփիւռք-Հայաստան պորտալարի վերջնական միացման վրայ։ Յիշենք, որ Աբեղեանական ուղղագրութիւնը Սովետի կողմէ միջոց էր՝ սեպ խրելու հայրենիքի եւ Սփիւռքի միջեւ, իսկ հիմա ճիշդ ժամանակն է այդ սխալները սրբագրելու, այլապէս Նոր Հայաստանի կերտումը ամբողջական պիտի չըլլայ։

Կարեւոր է նաեւ վերատեսութեան ենթարկել Հայոց Պատմութեան դասագիրքերը, որոնց մէջ անհրաժեշտ է մեծ տեղ տալ Հայաստանի Առաջին Հանրապետութեան կերտման ու անոր դերակատարներուն, որոնց մասին չափազանց շատ քիչ բան գիտէ Հայաստանի հասարակութիւնը։ Յիշենք, որ Հայաստանի Առաջին Հանրապետութեան շնորհիւ է, որ այսօր մենք ունինք մեր հրաշք հայրենիքը։

Հաւատալով Ձեր կարողութեան եւ ջանքերուն՝ վստահ եմ, որ նկատի պիտի առնէք մտահոգութիւններս, որպէսզի Սովետի պորտալարը վերջնականապէս փոխարինուի հայուն վայել Ազգային պորտալարով։

Յարգանքներով՝

Սեւակ Տումանեան

Յ.Գ. – Ստորագրեալս, տիկնոջս՝ Նայիրիի եւ զաւակներուս ՝ Վասակի, Վարագի եւ Վանէի հետ, Հայրենիք հաստատուած ենք Լիբանանի Այնճար Հայաբնակ շրջանէն, սփիւռքահայ չենք, այլ պարզապէս ՀԱՅ ենք։

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...