ՀՅԴ Հայաստանի Կազմակերպութեան 23-րդ Գերագոյն Ժողովի Յայտարարութիւնը

Հայ Յեղափոխական Դաշնակցութիւնը՝ հաւատարիմ իր սկզբունքներուն ու արժեհամակարգին, համահայկական կառոյցի զօրակցութեամբ, հետամուտ է Հայրենիքի հզօրացման, Հայաստանի եւ Արցախի Հանրապետութիւններու անվտանգութեան համակարգերու ամրապնդման, Հայրենիք-Սփիւռք փոխյարաբերութիւններու խորացման` համոզումով, որ միայն հանրային եւ համազգային համերաշխութեան պայմաններուն մէջ երկիրը ունակ է դիմագրաւելու ներազգային եւ արտաքին մարտահրաւէրները:

ՀՅԴ Հայաստանի կազմակերպութեան Գերագոյն Ժողովը կ՝արձանագրէ.

1. 2018 թ. ժողովրդային շարժումով եւ արտահերթ խորհրդարանական ընտրութիւններով պայմանաւորուած՝ Հայաստանի ներքաղաքական կեանքը մտած է բազմաթիւ մարտահրաւէրներու եւ անորոշութիւններու դիմագրաւման նոր շրջափուլ:
2. Արցախի հարցով իշխանութիւններու խուսափողական քաղաքականութիւնը մտահոգիչ է եւ չի նպաստեր հիմնախնդրի հանգուցալուծման շուրջ համազգային համախմբման։
3. Ազգային, աւանդական, հոգեւոր, մշակութային արժէքներու, պետական խորհրդանիշերու եւ հաստատութիւններու նկատմամբ ուղղորդուած հեղինակազրկման արշաւը, ինչպէս նաեւ ներազգային անհանդուրժողականութեան մթնոլորտը կը սպառնան ազգային անվտանգութեան եւ միասնականութեան:
4. Զարգացման ռազմավարական ծրագրերու բացակայութեան, անկանխատեսելի արտաքին քաղաքականութեան, ուղղորդուող արդարադատութեան, իշխանութիւններու որդեգրած գործելաոճի, կառավարման որակներու, ինչպէս նաեւ հանրային կեանքի բոլոր ոլորտներուն մէջ շօշափելի արդիւնքներ չարձանագրելու հետեւանքով զգալի է հանրային լաւատեսութեան անկման միտումը:

ՀՅԴ Հայաստանի կազմակերպութեան Գերագոյն ժողովը կը հաստատէ.

1. ՀՅ Դաշնակցութիւնը՝ համահայկական կառոյցի իր ողջ ներուժով, պիտի շարունակէ գործել «Զարգանալ` չզիջելով» ռազմավարական նպատակադրումով:
2. Հաւատարիմ կուսակցութեան սոցիալիստական գաղափարախօսութեան` Դաշնակցութիւնը հետամուտ պիտի ըլլայ հանրային համերաշխութեան եւ ընկերային արդարութեան հաստատման հրամայականին:
3. Իբրեւ ընդդիմադիր քաղաքական ուժ` Դաշնակցութիւնը պիտի շարունակէ լուսարձակի տակ պահել կառավարութեան իրականացուցած սոցիալ-տնտեսական քաղաքականութիւնը՝ հանդէս գալով իբրեւ աշխատաւորութեան, միջին խաւի եւ սոցիալապէս խոցելի խումբերու պաշտպան` հետեւողականօրէն պահանջելով կառավարութենէն` Հայաստանի մէջ ապահովելու սոցիալական պետութեան սահմանադրական պահանջի իրականացումը։

Դաշնակցութիւնը կը ստանձնէ ազգային, ժողովրդավարական, սոցիալիստական գաղափարական հենքով քաղաքական առանցք եւ իշխանութիւն ձեւաւորելու յանձնառութիւն՝ ի խնդիր ինքնիշխան, սոցիալական, իրաւական եւ ժողովրդավարական լիակատար պետութեան կայացման։