News

13
Sep

ՄԵՆՔ ՈՒ ՄԵՐՈՆՔ- Ներկան Ճշգրիտ Ընկալել

pakradestoukian

Բագրատ Էսդուգեան

Մարդու կեանքի տեւողութիւնը շատ չնչին ժամանակահատուած մը կը կազմէ պատմութեան հաստափոր գիրքին մէջ: Երբ կը խօսինք դարերու, նոյնիսկ հազարամեակներու սահմանումով, իսկապէս ալ աննշան կը մնան մարդկային կեանքի տարիները: Այդ պատճառաւ ալ կը դժուարանանք մեր ժամանակներու անցուդարձերը այժմէական կերպով իմաստաւորելու:

Կը կարծենք, թէ ահաբեկչութիւն կոչուածը պատահականօրէն յայտնուած չարագործութիւն մըն է: Մեզ կը հաւատացնեն, թէ չարամիտ մարդիկ յանկարծակի որոշումով մը կը լծուին հասարակութեան անդորրը խանգարելու: Մինչ ընկերաբանութիւնը կը թելադրէ գիտնալ, որ իւրաքանչիւր զարգացում ուրիշ կուտակումի մը հետեւանքն է: Ահա այս յարաբերութիւնը նկատելու համար անհրաժեշտ է որոշ ժամանակահատուածի մը ապրումը:

Բ. Համաշխարհային պատերազմի աւարտին, երբ Պաղեստինի մէջ կը ձեւաւորուէր Իսրայէլի պետականութիւնը, մարդիկ եղելութիւնը կը դիտէին ու կը մեկնաբանէին Հոլոքոսթին պատճառած սարսափի ենթահողին վրայ: Արեւմտեան աշխարհի, Եւրոպայի բազմադարեան հակասեմական ատելութիւնը, այս նոր պետութեան հիմնադրումը ողջունելով՝ կը սփոփէր իր խղճի խայթը: Այդ պահուն ոչ ոք կը մտաբերէր պաղեստինցիներուն մատնուած զրկանքը:

Նոյնպէս Ա. Աշխարհամարտին, երբ Միջին Արեւելքի երկիրներու սահմանները կ՛որոշուէին Սայքս-Փիքոյի նախաձեռնութեամբ, ոչ ոք մտահոգուեցաւ քիւրտ ժողովուրդի բնօրրանին չորսի բաժանումը տեսնելով: Անտեսման գլխաւոր առիթը քիւրտերուն նախորդ դարասկիզբին տակաւին ազգային ամբողջականութենէ զուրկ ըլլալն էր: Աշիրաթներու համակարգով տարանջատուած ցեղախումբը անշուշտ որ միասնական կամք մը չէր կրցած գոյացնել:

Այսօր, երբ Եւրոպա կը ցնցուի գաղթականներու հուժկու հոսանքին դիմաց, հասարակութիւնը դարձեալ ի վիճակի չէ այդ գաղթին տեղի տուող պայմանները ընկալելու: Բայց պատմութեան յետադարձ ակնարկ մը բաւ է ամէն ինչ յստակացնելու համար: Արեւմուտքը իրեն իրաւունքը համարեց հեռաւոր երկիրներու ճակատագիրը ճշդել: Կարծեց, թէ իր գործիչներուն միջոցաւ պիտի կարենայ իշխանութիւններ փոխել, սահմաններ վերահաստատել, իսկ ինք զերծ մնալ այդ ըրածներուն հետեւանքներէն:

Նոյնպէս ԱՄՆ, երբ Խորհրդային Միութեան դէմ կը ծրագրէր «Կանաչ Գօտի» կոչեալ յանցագործութեան նախագիծը, միտքովն իսկ չէր անցներ, թէ իր զինած «Քայիտա»ն պիտի յարձակի Նիւ Եորքի վրայ եւ ճամբայ պիտի բանայ յաջորդող տարիներուն Աֆղանիստանի, Իրաքի, Սուրիոյ եւ բովանդակ Միջին Արեւելքի հետ ամերիկեան եւ եւրոպական քաղաքներուն սարսափի մատնուելուն:

Ուրեմն, ի տարբերութիւն մեր այսօրուան տգիտութեան, պատմութիւնը պիտի յիշէ այս բոլորը: Մարդկութեան դէմ յանցագործներ ըլլալով պիտի արձանագրէ «Կանաչ Գօտի» նախագիծի հեղինակ Պրզեզինսկին, «Երեք կու տանք, հինգ կը վերցնենք» ըսելով՝ Իրաքի դէմ պատերազմի քարոզչութիւն ընող Թուրկութ Էօզալը, կամ «Ուրբաթ օրուան նամազը Դամասկոս կ՛ընենք» յայտարարող Էրտողանը:

Վստահ եղէք, որ Եգէական ծովու խաւար ջուրերուն մէջ զոհուածներու շարաւիղները տակաւին հաշիւներ ունին մաքրելու: Չըլլա՛յ որ հաշուեփակի պահուն զանոնք մեղադրէք: Բո՛ւն մեղաւորները՝ լազուարթ տարազներով, փողկապներ կապած, բազմած են արեւմտեան երկիրներու խորհրդարաններուն: Եթէ խնդիր մը ունիք, ապա իրե՛նց հետ է, այլ ոչ թէ մինուճար գաղթականներուն:

Թողէք բերնի ծամոց եղած «ահաբեկիչներ» յանկերգը եւ ներկայ վայրագութիւնը հասցէագրեցէք հեղինակի՛ն, այլ ոչ թէ ճարահատ մահապարտին։

 

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...