News

30
Mar

Նահապետ Քուչակի Նուիրուած Երեկոյ Եւ Կարօ Աւեսեանի «Երեք Հայրէն Քուչակէն» Ստեղծագործութեան Գինեձօն Պէյրութի Մէջ

Կազմակերպութեամբ Պէյրութի «Բարսեղ Կանաչեան» երաժշտական քոլեճին, երէկ` Ուրբաթ, 29 Մարտի երեկոյեան ժամը 8:30-ին, «Լեւոն Շանթ» մշակութային կեդրոնի «Գ. եւ Հ. Արմէնեան» սրահին մէջ տեղի ունեցաւ Նահապետ Քուչակի, անոր կեանքին, ստեղծագործութիւններուն եւ ժառանգին նուիրուած իւրայատուկ երեկոյ մը, որուն ընթացքին կատարուեցաւ Կարօ Աւեսեանի «Երեք հայրէն Քուչակէն» ստեղծագործութեան գինեձօնը: Այս մասին կը հաղորդէ «Ազդակ»-ը։

Բացման խօսքը արտասանեց «Բարսեղ Կանաչեան» երաժշտական քոլեճի տնօրէն Վահրամ Էմմիեան, որ անդրադարձաւ երաժշտութեան ունեցած մեծ արժէքին. «Երաժշտութիւնը շատ աւելի բարձր է, քան ամէն իմաստասիրութիւն, անիկա կը բանայ այն դռները, զորս բառերը անկարող են բանալ: Երաժշտութիւնը շօշափելի չէ, ուստի եւ կը բարձրանայ երկինքն ի վեր` հասնելով անհունին: Եւ ահա այս է պատճառը, որ երաժշտութիւնը անբաժան մասն է կրօնական արարողութիւններուն, որովհետեւ երաժշտութիւնը հրեշտակներու լեզուն է եւ ուղղակիօրէն կը հասնի Աստուծոյ ականջին` իրեն հետ տանելով խօսքն ու անուշաբոյր խունկը»: Ան դիտել տուաւ, որ երաժշտութիւնը նաեւ կը ներթափանցէ մարդուն խորքը, կը փոխէ անոր տրամադրութիւնը, ունի բուժիչ յատկութիւն, ծնունդ կ՛առնէ զայն յօրինողին հոգիի խորքէն եւ կատարողներուն ճամբով կը ներթափանցէ ունկնդիրներու հոգիներուն խորքը` շեշտելով, որ անիկա աւելի ազդու կը դառնայ, երբ բարձրորակ է եւ զայն կատարողը ինքնին տուեալ երաժշտութիւնը յօրինողն է:

Այս հաստատումէն մեկնելով Վահրամ Էմմիեան դիտել տուաւ, որ այդ ձեռնարկին ներկաները այդ վայելքը պիտի ապրին, որովհետեւ «Երեք հայրէն Քուչակէն» ստեղծագործութեան մեկնաբանութեան իր մասնակցութիւնը պիտի բերէ անոր հեղինակը` Կարօ Աւեսեան: Ան աւելցուց, որ գինեձօնին կողքին անդրադարձ պիտի կատարուի նաեւ այդ երգերու խօսքերու հեղինակին` Նահապետ Քուչակին:

Անկէ ետք Արին Գալուստեան հետաքրքրական ձեւով եւ պաստառի վրայ ցուցադրութեամբ ներկայացուց Նահապետ Քուչակի կեանքն ու գործը, արժէքը իր կենդանութեան օրերուն իսկ, անոր կապուած աւանդապատումները: Ան դիտել տուաւ, որ Քուչակի հայերէն եւ թրքերէն ստեղծագործութիւնները ամէնէն աւելի ժողովրդականացած են Ակն քաղաքին մէջ` հաստատելով, որ ան երգած է սէրը, բերկրանքը, խաղաղութիւնը եւ կեանքի զանազան վիճակներ, սակայն ան նկատուած է սիրոյ երգիչ, որովհետեւ անոր մօտ տիրական եղած են սիրոյ տարբեր արտայայտութիւնները, որոնք ազատագրուած են կրօնական կաշկանդումներէ: Ըստ Արին Գալուստեանի, Նահապետ Քուչակ կրցած է սիրողի մը հոգեբանութեան բոլոր ծալքերը թափանցել, իր հայրէններուն մէջ երգել անկաշկանդ սէրը, առանց հոգիի ու մարմնի կռիւի, հեռու ամէն տեսակ սահմանափակումներէ, որովհետեւ ան հաւատացած է, որ սէրը գերագոյն գեղեցկութիւն է, ուստի զայն պէտք է բարձր պահել ու լիովին ապրիլ: Ասկէ մեկնելով է, որ անոր մօտ նկատելի են միջնադարեան ժամանակաշրջանին համար յանդուգն պատկերներ, որոնք ձեւով մը բողոքի արտայայտութիւն են տիրող իրականութեան դէմ, նաեւ այն, որ Քուչակ կը հակադրուի եկեղեցւոյ եւ կղերականներուն:

Ա. Գալուստեան լուսարձակի տակ առաւ այն հետաքրքրական ու ստեղծագործողի մը համար կարեւոր երեւոյթը, որ Նահապետ Քուչակի սիրածը իրական է, ապրող ու շնչող էակ է, որ տարբեր տեսակի ազդեցութիւն ունի եւ այլազան զգացումներու ծնունդ կու տայ շատ անմիջական ու իսկական դրսեւորումներով: Անոր հայրէններուն մէջ տեղ գտած է նաեւ մերժուած սէրը, տառապանքը, սակայն կառչածութիւնը սիրոյ. ունի փիլիսոփայական քառեակներ, ունայնութեան եւ պանդխտութեան նուիրուած տողեր:

Նշենք, որ քուչակեան ընթերցումներուն իր մասնակցութիւնը բերաւ Ռազմիկ Տէրունեան:

Ապա խօսք առաւ Կարօ Աւեսեան, որ անդրադարձաւ «Երեք հայրէն Քուչակէն» ստեղծագործութեան ծնունդին` դիտել տալով, որ դիւրին չէ գտնել նման գրութիւն, ուր արդէն երաժշտութիւն կայ, ուր երաժշտութիւն կրնայ ծնունդ առնել եւ տարածուիլ` աւելցնելով, որ ընտրած է այնպիսի տուներ, որոնք կարելի է իրարու շաղկապել եւ ամբողջութիւն մը գոյացնել: Ան խօսեցաւ իր փորձառութեան մասին` յիշելով, որ ստեղծագործութիւնը գրուած է ձայնի ու երաժշտութեան համար եւ երգուած է նաեւ օտարներու կողմէ: Կ. Աւեսեան յատկապէս յիշեց իր դասախօսն ու խորհրդատուն` միջազգային վարկ ու համբաւ վայելող արհեստավարժ երաժիշտ Աշոտ Զոհրապեանը, որուն շնորհակալութիւն յայտնեց, նաեւ երախտագիտութիւն յայտնեց Համազգայինի «Բարսեղ Կանաչեան» քոլեճին:

Ձեռնարկին ընթացքին սոփրանօ Սթեֆանի Քոչարեան, դաշնակի ընկերակցութեամբ Կարօ Աւեսեանի, մեկնաբանեց Նահապետ Քուչակի հայրէններէն փունջ մը:

Աւարտին Համազգայինի կողմէ գնահատագիր մը յանձնուեցաւ Կարօ Աւեսեանին` «Բարսեղ Կանաչեան» երաժշտական քոլեճի տեսական նիւթերու ուսուցիչին եւ լարային համոյթի խմբավարին, օգոստոս 2018-ին Պուտափեշտի մէջ 14-րդ աւանդական «Տանիւպ» նուագախմբային խմբավարութեան միջազգային մրցանքի առաջին մրցանակին տիրանալուն համար: Արդարեւ, ան գերազանցելով իր 15 մրցակիցները, տիրացած է առաջին (Ֆըրսթ Փրայզ) եւ գլխաւոր (Կրանտ Փրայզ) մրցանակներուն, ինչ որ մեծ ուրախութիւն ու պատիւ է Համազգայինի «Բարսեղ Կանաչեան» երաժշտական քոլեճին, աշակերտութեան, ուսուցչական կազմին ու տնօրէնութեան:

 

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...