News

08
Jan

Պոլսոյ Նորընտիր Պատրիարքը Վշտացած է Ծերակոյտին Կողմէ Հայոց Ցեղասպանութեան Բանաձեւին Ընդունումէն

«Քալիֆորնիա Քուրիըր» (www.TheCaliforniaCourier.com) թերթի հրատարակիչ եւ խմբագիր Յարութ Սասունեան

Անցեալ ամիս պատասխանեցի Պոլսոյ նորընտիր պատրիարք Սահակ Բ եպիսկոպոս Մաշալեանի՝ թրքական թերթին տուած հարցազրոյցին, որուն միջոցով ան քննադատած էր ԱՄՆ Ծերակոյտին կողմէ Հայոց Ցեղասպանութեան բանաձեւին ընդունումը:

Այդ ժամանակէն ի վեր, հայոց աշխարհը անհանգստացած է, որ պատրիարքը շարունակած է հարցազրոյցներ տալ թրքական լրատուամիջոցներուն՝ կատարելով թրքամէտ եւ հակահայկական մեկնաբանութիւններ: Ինչպէս գրած էի նախապէս, հասկնալի է, որ Պոլսոյ հայկական համայնքի մնացորդները պատանդ են թրքական վարչակարգի դաժան ձեռքերուն մէջ։ Հետեւաբար, մենք պէտք է որոշ ըմբռնումով մօտենանք անոնց կասկածելի արտայայտութիւններուն։ Այնուամենայնիւ, ոչ բոլոր յայտարարութիւնները կը կատարուին ճնշման տակ: Անոնց ժխտական յայտարարութիւններէն քանի մը հատը կը կատարուին իրենց սեփական կամքով՝ առանց թրքական կառավարութեան կողմէ որեւէ ճնշման: Երբեմն, Թուրքիոյ որոշ հայեր հակահայկական յայտարարութիւններ կ՝ընեն պաշտպանելու համար իրենց գործարար ձեռնարկները թուրք պաշտօնեաներու հետ կամ պահպանելու իրենց աթոռները՝ սիրաշահելով թրքական իշխանութիւնները։ Ուստի, պէտք չէ ինքնաբերաբար գալ այն եզրակացութեան, որ պէտք է զերծ մնալ անոնց թրքամէտ յայտարարութիւնները քննադատելէն միայն այն պատճառով, որ անոնք կ՝ապրին Թուրքիոյ մէջ: Ամէն ինչ կախուած է յայտարարութեան հանգամանքներէն եւ այն աստիճանէն, որմով պոլսահայը կը յարձակի հայ ժողովուրդի եւ անոր քաղաքական պահանջներուն վրայ։

Թրքական «Միլիյեթ» եւ «Սապահ» թերթերուն հարցազրոյցներ տալէ ետք՝ պատրիարք Մաշալեան շարունակած է մնալ թրքական լրատուամիջոցներու ուշադրութեան առարկան։  2020 Յունուար 2-ին, ան ըսած է «Աքշամ» թերթին, որ սփիւռքահայերը եւ պոլսահայերը կապ չունին իրարու հետ եւ Սփիւռքը հարիւր տարի ետ մնացած է։

Պատրիարք Մաշալեան աւելցուցած է․ «Թուրքիոյ մէջ բոլոր փոքրամասնութիւնները համակարծիք են, որ մենք մեր ամենահանգիստ ժամանակաշրջանը կ՝ապրինք նախագահ Էրտողանի իշխանութեան տարիներուն»։ Պատրիարքը, կարծես թէ, մոռցած է, որ վերջին 12 տարիներուն հայ համայնքին չեն արտօնած փոխարինող պատրիարք ընտրել այն բանէն ետք, երբ նախկին պատրիարքը կը գտնուէր մահաքունի մէջ։ Էրտողանի կառավարութիւնը նաեւ արգիլած էր Թուրքիոյ շարք մը հայ հոգեւորականներու մասնակցութիւնը պատրիարքական ընտրութիւններուն՝ պարզապէս այն պատճառով, որ անոնք կը ծառայէին Թուրքիոյ սահմաններէն դուրս գտնուող եկեղեցական ծուխերու մէջ։ Պատրիարք Մաշալեան, ամենայն հաւանականութեամբ, չէր ընտրուեր, եթէ միւս թեկնածուներուն արտօնուէր մասնակցիլ ընտրութիւններուն:

«Օսմանեան կայսրութեան ժամանակաշրջանէն ի վեր փոքրամասնութիւններուն խնդիրները օգտագործուած են Թուրքիոյ ներքին գործերուն միջամտելու համար: Մենք չենք ուզեր, որ այս հարցին պատճառով Թուրքիան վնասներ կրէ միջազգային քաղաքականութեան մէջ: Մենք այս երկրի քաղաքացիներն ենք, եւ այս երկրի դէմ ուղղուած իւրաքանչիւր խօսք մեզի եւս կը վիրաւորէ»,- ըսած է պատրիարքը «Աքշամ» թերթին։

Բացի այդ, Պոլսոյ պատրիարքը յայտարարած է, որ «հայկական սփիւռքը մեզի հետ կապ չունի: 1915-ը եւ անոր յաջորդող յիշողութիւնները փոխանցուած են սերունդէ սերունդ։ Անոնք տեսած են, որ այս հարցը առնուազն կը պահպանէ իրենց միասնութիւնը եւ կը ստեղծէ ժխտական հաւաքական գիտակցութիւն: Ստեղծուած է ողբերգութեան վրայ հիմնուած հաւաքական գիտակցութիւն։ Անոնք չեն ուզեր կորսնցնել զայն։ Իսկ մենք այդ դէպքերէն ետք մնացած ենք այս հողերուն վրայ։ Մենք որոշեցինք ապրիլ այլ ներկայացուցիչներու հետ միասին։ Սփիւռքը հարիւր տարի ետ մնացած է․․․ Մեր եւ Սփիւռքի կողմէ իսլամը հասկնալու ձեւին մէջ տարբերութիւն կայ։ Իրականութեան մէջ ժողովուրդը շատ աւելի մեղմ է: Անոնք ատոր մասին կը յիշեն Ապրիլ 24-ին եւ կը մոռնան մինչեւ յաջորդ Ապրիլ 24-ը»։

Շարունակելով իր հակահայկական խաչակրաց արշաւանքը, պատրիարք Սահակ Բ-ն 2020 թ․ Յունուար 2-ին թրքական NTV-ին ըսաւ, որ Հայոց Ցեղասպանութիւնը ճանչցող ԱՄՆ Ծերակոյտին բանաձեւը «վիրաւորած է զիս»։ Պատրիարքը նաեւ ըսաւ. «Մենք Սփիւռք չենք: Մենք միշտ եղած ենք այստեղ եւ մնացած ենք այս երկրին մէջ: 1915 թ․ դառը իրադարձութիւններէն ետք մենք որոշեցինք մնալ այստեղ։ Մենք 105 տարի ապրած ենք այլ կերպ, քան սփիւռքահայերը: Անոնք գոյատեւած են 1915 թուականի ցաւի դառն յիշողութիւններով, որոնք փոխանցած են սերունդէ սերունդ: Մենք վերապրած ենք այդ ցաւը։ Մենք զայն չենք մոռցած, սակայն վերապրած ենք զայն։ Տեղի ունեցած է միասին ապրելու կախարդանք»։

Պատրիարք Սահակ Բ ունեցած է հակասական անցեալ՝ տարբեր տարօրինակ միջադէպերով: Սակայն հիմա ես կը նախընտրեմ չանդրադառնալ այդ հարցերուն։ Հաճելի չէ յարձակիլ բարձրաստիճան հայ հոգեւորականի վրայ։ Պարզապէս կ՝ուզեմ հակիրճ մէջբերում ընել պատրիարքի 2017 թ․ գրածէն․ «Եկեղեցիին նուիրած եմ իմ կեանքը, իմ երիտասարդութիւնը եւ իմ տղամարդկութիւնը: Ես ընտանիք չունիմ։ Վեց տարի ապրած եմ Պատրիարքարանի 20 քառակուսի մեթրանոց սենեակին մէջ»:

Պատրիարք Սահակ Բ-ի՝ թրքական լրատուամիջոցներուն ըրած յայտարարութիւնները, անոր պաշտօնավարման ժամկէտի սկիզբէն իսկ, նոյնիսկ նախքան անոր գահակալութեան հանդէսը, լաւ նշան չեն: Բազմաթիւ հայեր, ինչպէս Թուրքիոյ մէջ, այնպէս ալ դուրսը, կը բողոքէին, որ անոր մրցակիցը՝ Արամ արքեպիսկոպոս Աթէշեանը, խիստ ենթակայ էր թրքական իշխանութիւններուն: Թէեւ այդպիսի պահուածքը որոշ չափով հասկնալի է՝ հաշուի առնելով թրքական իշխանութիւններու կեղեքիչ բնոյթը, սակայն նորընտիր պատրիարքը շատ աւելի գերազանցած է իր մրցակիցին հնազանդ պահուածքը:

Պատրիարք Սահակ Բ-ի ինքնանուաստացուցիչ խօսքերը թրքական լրատուամիջոցներուն, պարզապէս, Հայոց Ցեղասպանութեան թրքական ժխտողականութեան կրկնութիւնն են եւ ԱՄՆ Ծերակոյտին կողմէ վերջերս անոր ճանաչման մերժումը: Աւելին, իրեն համադրելով թրքական կառավարութեան հետ՝ պատրիարքը ինքզինք եւ Թուրքիոյ հայ համայնքը կը հեռացնէ Սփիւռքէն, ինչպէս թուրք իշխանաւորները արգիլեցին Սփիւռքի մէջ ծառայող թրքահայ հոգեւորականներին մասնակցելու պատրիարքական ընտրութիւններուն:

Պատրիարք Սահակ Բ կ՝ապրի իր նոր պաշտօնի մեղրամիսի ժամանակաշրջանը: Այնուամենայնիւ, ինչպէս տեսանք նախապէս, Թուրքիոյ կառավարութիւնը ցանկացած պահ կրնայ զօրացնել ճնշումը տեղի հայ համայնքին վրայ: Երբ ատիկա տեղի ունենայ, հայկական Սփիւռքն է, որ պիտի փորձէ օգնութեան հասնիլ Թուրքիոյ հայ համայնքին՝ անտեսելով պատրիարքի անցանկալի խօսքերը ընդդէմ Սփիւռքի․․.

Աւելին, ես գիտեմ, որ պատրիարքը Սփիւռքի քննադատական յայտարարութիւնները պիտի օգտագործէ թրքական իշխանութիւններուն մօտ միաւորներ շահելու համար:

 

Թարգմանութիւնը կատարեց Ռուզաննա Աւագեան

Արեւմտահայերէնի վերածեց ԵՌԱԳՈՅՆ-ը 

 

 

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...