News

29
Mar

«Սէուտական Արաբիոյ Ապտալլա Թագաւորին Հաստատած Միջկրօնական Կեդրոնը Կարեւոր Դեր Ունի Կատարելիք» Կ՛ըսէ Արամ Ա. Կաթողիկոս

Հինգշաբթի, 28 Մարտ 2019-ի երեկոյեան, Արամ Ա. կաթողիկոս ընդունեց Վիեննայի մէջ Ապտալլա Բ. թագաւորին կողմէ հաստատուած միջկրօնական երկխօսութեան միջազգային կեդրոնի քրիստոնեայ-իսլամ գործակցութեան ծրագիրի արաբական աշխարհին ներկայացուցիչները, որոնք եկած էին արաբական տարբեր երկիրներէ եւ կը ներկայացնէին զանազան կրօնական համայնքներ ու ընկերութիւններ: Պատուիրակութիւնը կը գլխաւորէր կեդրոնի ընդհանուր քարտուղար Ֆէյսալ Պըն Մուամմար:

«Վիեննայի մէջ Ապտալլա Բ. թագաւորին կողմէ հաստատուած միջկրօնական երկխօսութեան ու գործակցութեան միջազգային կեդրոնը կարեւոր դեր ունի կատարելիք յատկապէս ներկայ ժամանակներուն, երբ ընկերութեան կեանքին մէջ կրօնին դերը սկսած է շեշտուիլ` երբեմն դրական ու երբեմն բացասական մօտեցումներով եւ հետեւանքներով: Աշխարհի կրօնները հիմնուած են խաղաղութեան ու սիրոյ, արդարութեան ու ճշմարտութեան հասարակաց արժէքներու վրայ: Պէտք է ամրապնդել այս արժէքներուն ներկայութիւնը կրօնի հետեւորդներու կեանքին մէջ», ըսաւ Արամ Ա. կաթողիկոս:

Խօսելով յատկապէս քրիստոնեայ-իսլամ յարաբերութեանց մասին` Արամ Ա. կաթողիկոս ըսաւ, թէ «դարեր շարունակ միաստուածեան այս երկու կրօնները գոյակցած են փոխադարձ յարգանքի ու վստահութեան մթնոլորտի մէջ: Եօթներորդ դարէն սկսեալ հայ ժողովուրդը Հայաստանի եւ Մերձաւոր Արեւելքի մէջ մնայուն եւ սերտ յարաբերութիւն մշակած է իսլամութեան հետ: Մեր տարբերութիւնները ճանչցած ու յարգած ենք, միաժամանակ կառչած ենք մեր հասարակաց արժէքներուն, որոնք հիմքը կը կազմեն միաստուածեան կրօններուն: Ներկայ ժամանակներուն, երբ դժբախտաբար կրօնը սկսած է շահագործուիլ ոչ կրօնական նպատակներու համար, անհրաժեշտ է, որ քրիստոնեայ-իսլամ գործակցութիւնը աւելի ամրապնդուի»:

Ակնարկելով վերջերս Նոր Զելանտայի մէջ կատարուած ոճրային արարքին` վեհափառ հայրապետը խստօրէն դատապարտեց զայն` նշելով. «Երկու մզկիթներուն դէմ անհաւասարակշիռ անձի մը կողմէ կատարուած ոճրային արարքը խստօրէն դատապարտելի է: Քրիստոնեայ ու իսլամ պատասխանատուները պէտք է յատկապէս դաստիարակութեան ճամբով հեռու պահեն իրենց հետեւորդները նման բռնարարքներէ եւ կրօնի շահագործումէն: Այս գծով Վիեննայի միջկրօնական կեդրոնին առաքելութիւնը, որուն մօտէն ծանօթ ենք, կը նկատենք խիստ անհրաժեշտ: Բարձր գնահատանքով կ՛ողջունենք կեդրոնին կատարած աշխատանքները: Մեծի Տանն Կիլիկիոյ կաթողիկոսութիւնը պիտի շարունակէ իր գործօն մասնակցութիւնը բերել կեդրոնի ծրագիրներուն»:

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...