News

15
Dec

Սիւնիքի Մարզին Մէջ Բացուեցաւ «Մեղրի» Ազատ Տնտեսական Գօտին

1513328969091

Լուսանկարները՝ News.am-ին

ՀՀ վարչապետ Կարէն Կարապետեանի ներկայութեամբ` Դեկտեմբեր 15-ին տրուեցաւ «Մեղրի» ազատ տնտեսական գօտիի գործունէութեան մեկնարկը: Ըստ «Արմենպրես»-ի՝ բացման արարողութեան ներկայ էին նաեւ ՀՀ տնտեսական զարգացման եւ ներդրումներու նախարար Սուրէն Կարայեանը, Սիւնիքի մարզպետ Վահէ Յակոբեանը, Հայաստանի մէջ Իրանի Իսլամական Հանրապետութեան արտակարգ եւ լիազօր դեսպան Սեյետ Քազեմ Սաջատին, խումբ մը գործարարներ:

 Սուրէն Կարայեան նշեց, որ տնտեսական գօտին նախատեսուած է կառուցապատել երկու փուլով: «Առաջին փուլով ստեղծուած են նուազագոյն անհրաժեշտ ենթակառուցուածքներ ու նախապայմաններ ԱՏԳ աշխատանքները մեկնարկելու եւ այնտեղ գործելու ցանկութիւն ունեցող ընկերութիւններու գործունէութիւնը կազմակերպելու համար»,-ըսաւ նախարար Կարայեան:

Անոր տեղեկացմամբ` երկրորդ փուլով կը նախատեսուի ԱՏԳ գործունէութեան համար անհրաժեշտ ենթակառուցուածքներու եւ տարածքի յաւելեալ 70 հեքթարով ընդլայնում` ստեղծելով նախապայմաններ շահութաբեր գործ ծաւալելու համար: Մասնաւորապէս, նշեալ տարածքներէն շուրջ 50 հեքթարը պիտի տրամադրուի շահագործողներու գործունէութեան ապահովման, 10 հեքթարը` պահեստային տարածքներուն, մնացածը գրասենեակային եւ այլ ծառայութիւններու համար է:

1513329087375

«Կը նախատեսուի առաջիկայ տարիներուն ներգրաւել 50-70 շահագործող ընկերութիւններ, որոնք պիտի իրականացնեն շուրջ 100-130 միլիոն տոլարի ներդրումներ, պիտի ստեղծեն 1500 նոր աշխատատեղ եւ պիտի արտահանեն 250 միլիոն տոլարի ապրանքներ ու ծառայութիւններ»,-աւելցուց նախարարը: Անոր հաւաստմամբ` արդէն իսկ կան յստակ ընկերութիւններ, որոնք ցանկութիւն յայտնած են գործունէութիւն ծաւալելու «Մեղրի» ազատ տնտեսական գօտիին մէջ, եւ յառաջիկայ օրերուն անոնցմէ հինգի հետ պիտի ստորագրուին համաձայնագիրները:

Նախարարը նաեւ կարեւոր նկատեց այն փաստը, որ նորաբաց «Մեղրի» եւ Իրանի «Արաս» ազատ տնտեսական գօտիներու միջեւ արդէն իսկ ստորագրուած է համագործութեան յուշագիր, որ պիտի նպաստէ երկկողմ տնտեսական համագործակցութեան եւ առեւտրաշրջանառութեան ծաւալներու աւելացման:

 Կարայեանի խօսքով` Մեղրի ԱՏԳ-ի մէջ գործունէութիւն ծաւալելու հետաքրքրութիւն կը ցուցաբերեն նաեւ եւրոպական, ռուսական եւ իրանական ընկերութիւնները:

Հայաստանի հարաւային սահմանին տեղակայուած «Մեղր»է ԱՏԳ-ի մէջ գործունէութիւն ծաւալողները պիտի ազատուին շահութահարկէ, աւելցուած արժէքի հարկէ, ակցիզային հարկէ եւ մաքսատուրքերէ` վճարելով միայն եկամտային հարկ:

Ազատ տնտեսական գօտիին մէջ հնարաւորութիւնները հնարաւորին չափ օգտագործելու համար թոյլատրուած է ոլորտային լայն ընդգրկուածութիւն. ներկայացուած պիտի ըլլան գիւղատնտեսութեան, մշակող արդիւնաբերութեան, առեւտուրի, փոխադրումներու եւ պահեստային տնտեսութեան, զբօսաշրջութեան եւ այլ ոլորտներ:

ԱՏԳ-ի գործունէութեան ժամկետը 50 տարի է:

Ծրագրի իրականացման նպատակով ՀՀ կառավարութեան կողմէ հիմնադրուած է «ՄԵՂՐԻ ԱԶԱՏ ՏՆՏԵՍԱԿԱՆ ԳՈՏԻ» ՓԲԸ-ն: Ընկերութեան 100 տոկոս բաժնետոմսերու փաթեթը կը տնօրինուի «Համահայկական ֆոնտ» փակ ոչ հրապարակային պայմանագրային ներդրումային ֆոնտին կողմէ:

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...