News

28
Feb

Սումգայիթի Ջարդերուն 30–րդ Տարելիցի Առիթով՝ Արցախի Եւ Հայաստանի Խորհրդարանները Հանդէս Եկած Են Յայտարարութիւններով

aj.thumb

Արցախի Հանրապետութեան Ազգային ժողովը Փետրուար 28-ի լիագումար նիստի ընթացքին ընդունած է Սումգայիթ քաղաքի հայ բնակչութեան կոտորածի 30–րդ տարելիցի կապակցութեամբ յայտարարութիւն:

Յայտարարութեան մէջ մասնաորապէս ըսուած է.

«1988 թուականի Փետրուար 27-29, Պաքուէն ընդամէնը 30քմ․ հեռաւորութեան վրայ գտնուող Սումգայիթ քաղաքի հայ բնակչութեան հանդէպ Ատրպէյճանի իշխանութիւններու կողմէ իրականացուած է կոտորած եւ բռնի տեղահանութիւն: Նախապէս ծրագրուած վայրագութիւններուն զոհ դարձած են հարիւրաւոր հայեր, մեծ մասամբ` կանայք, երեխաներ եւ ծերեր, հազարաւոր հայեր զանգուածային բռնութիւններով տեղահանուած են, իսկ անոնց պատկանող գոյքը` յափշտակուած:

«Սումգայիթի մէջ կազմակերպուած յանցագործութիւնը ատրպէյճանական իշխանութիւններու` Նախիջեւանի օրինակով խտրականութեան, էթնիկ զտումներու եւ հայաթափման խորհրդային տարիներուն անպատիժ իրագործուող քաղաքականութեան հերթական դրսեւորումն էր, որ շարունակուեցաւ Պաքուի, Գանձակի, Հիւսիսային Արցախի միւս հայաբնակ վայրերուն մէջ: Այդ վայրագութիւններով Պաքուի իշխանութիւնները կը սպառնային իր իրաւունքներու պաշտպանութեան համար ոտքի ելած արցախահայութեան` պատանդ դարձնելով Արեւելեան Անդրկովկասի հայութիւնը: Մինչդեռ այդ օրերուն Արցախի մէջ ծաւալող համաժողովրդական ազատագրական պայքարը կոչուած էր վերջ դնելու հայ մարդու ազգային արժանապատւութեան հանդէպ ոտնձգութիւններուն եւ ատրպէյճանական իշխանութիւններու ցեղասպան քաղաքականութեան:

«Յարգելով սումգայիթեան եղեռնագործութեան զոհ դարձած անմեղ հայերու յիշատակը եւ համոզուած ըլլալով, որ պետական մակարդակով իրականացուած հայ բնակչութեան ջարդերն ու կոտորածը անպատիժ ձգելը յանգեցուց զանգուածային նոր յանցագործութիւններու եւ Ատրպէյճանի կողմէ նորանկախ Լեռնային Ղարաբաղի Հանրապետութեան ժողովուրդի դէմ պատերազմի` Արցախի Հանրապետութեան Ազգային ժողովը. 

“կը դատապարտէ խտրականութեան, այլատեացութեան եւ անհանդուրժողականութեան որեւէ դրսեւորում, 

“կը գտնէ, որ պաշտօնական Պաքուն ցայսօր կը շարունակէ ըլլալ ցեղասպանութեան քաղաքականութեան կրողը, որու վերջին վկայութիւնը 2016-ի Ապրիլին Արցախի քաղաքացիական բնակչութեան հանդէպ իրականացուած յանցագործութիւններն են,

“կը վերահաստատէ, որ Արցախի Հանրապետութիւնը հետեւողական պիտի ըլլայ բռնութիւններու եւ տեղահանման ենթարկուած ատրպէյճանահայութեան իրաւունքներու վերականգնման ու պաշտպանման գործին,

“կոչ կ՛ընէ խորհրդարանական կառոյցներուն, միջազգային իրաւապաշտպան կազմակերպութիւններուն Սումգայիթի հայ բնակչութեան զանգուածային ջարդերու ու կոտորածի 30-րդ տարելիցի կապակցութեամբ դատապարտելու Պաքուի կողմէ ատրպէյճանահայութեան դէմ իրագործած ցեղասպանական գործողութիւնները»:

ՀՀ Ազգային ժողովը նոյնպէս քննարկման դրաւ եւ միաձայն ընդունեց բոլոր խմբակցութիւններու կողմէ հեղինակուած «Հայերու նկատմամբ Ատրպէյճանի ոճրագործութիւններու դատապարտման վերաբերեալ» Հայաստանի ազգային ժողովի յայտարարութեան նախագիծը:

Յայտարարութեան մէջ յստակ նշուած են հայերու դէմ կատարուած ատրպէյճանական իշխանութիւններու բոլոր ոճրագործութիւնները, որոնք կը դիտարկուին որպէս հայ ժողովուրդը իր բնօրրանէն դուրս մղելու եւ ոչնչացնելու հետեւողական քաղաքականութեան դրսեւորում, որ դեռ սկիզբ առած է 1918 թուականէն եւ շարունակական բնոյթ կը կրէ:

«Հայաստանի Հանրապետութեան Ազգային ժողովը կը դատապարտէ խաղաղ բնակչութեան դէմ Ատրպէյճանի կողմէ իրագործուած զանգուածային բռնութիւնները, սպանութիւնները եւ տեղահանումները, ինչպէս նաեւ հայատեաց ցեղապաշտական քաղաքականութիւնը եւ Լեռնային Ղարաբաղի դէմ սանձազերծած ռազմական գործողութիւնները, կ՛ոգեկոչէ անմեղ զոհերու յիշատակը եւ կոչ կ՛ընէ խորհրդարաններուն, խորհրդարանական վեհաժողովներուն, միջազգային կազմակերպութիւններուն, մարդու իրաւունքներու պաշտպանութեամբ զբաղուող կառոյցներուն դատապարտելու խաղաղ բնակչութեան նկատմամբ Ատրպէյճանի իրականացուցած եւ շարունակուող ոճրագործութիւնները, միջազգային մարդասիրական իրաւունքներու խախտումներով, որոնք սպառնալիք են ոչ միայն հայ ժողովուրդին, այլեւ ողջ տարածաշրջանի անվտանգութեան, կայունութեան եւ զարգացման համար»,-ըսուած է յայտարարութեան մէջ:

Արմէն Աշոտեան տեղեկացուցած է, որ նախագիծը հասանելի պիտի ըլլայ նաեւ օտար լեզուներով:

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...