News

06
Apr

Վարձքը Կատա՛ր Բոլորին

Յ. Լատոյեան

Քորոնայի ճգնաժամային շտապի աշխատանքներուն համար անցնող շաբթուան ընթացքին նուիրատուութիւններ կատարուեցան եւ կը կատարուին տակաւին:

Նախազգուշական արշաւի համար սկսած շտապը օրը-օրին մարտահրաւէրներու առջեւ կը գտնուի: Պետութիւններ անկարող են կազմակերպելու եւ երեւոյթին դէմ յանդիման կենալու:

Լիբանանահայութիւնը իր կառոյցներով անգամ մը եւս եկաւ փաստելու, որ ինքնուրոյն է իր կազմակերպուած ուժով եւ պատրաստակամութեամբ:

Այսօր փաստօրէն 5.000 ընտանիք եւ աւելի կարիքը ունի սնունդի: Շտապը արդէն սկսաւ 3.000 ընտանիքի սննդեղէնի կտրօններ եւ տուփեր բաժնել:

Բոլորին պիտի փորձենք հասնիլ: Ո՛չ կուսակցական, ո՛չ համայնքային, ո՛չ ընտրական եւ ո՛չ ալ այլ նախապաշարումներ կան: Սակայն, զտումը այնպէս մը կ’ըլլայ, որ ընտանիք մը եթէ մէկ անգամ ստացաւ, երկրորդ անգամ չստանայ: Այդ նպատակով ալ ստուգումներ կը կատարուին:

Կաթողիկոսարանէն, Ազգային առաջնորդարանէն, Հայ կաթողիկէ համայնքէն, քաղաքապետութիւններէն օժանդակութիւն ստացողները  բնականաբար առիթ պէտք է տան, որ ուրիշներն ալ ստանան:

Պարզապէս հասկացողութեամբ եւ իրարու օգտակար ըլլալու սկզբունքով օգնենք իրարու:

Այս ուղղութեամբ խօսք մըն ալ նուիրատուներուն:

Նուիրատուներ կան, որ բոլոր առիթներով մեր գաղութի բարօրութեան, կրթական, մարզական, մշակութային, քաղաքական, կրօնական, բարեսիրական մարզերուն մէջ օգտակար կ’ըլլան միշտ: Շնորհակալութիւն նախ իրենց վեհանձնութեան եւ օրինակելի ընթացքին համար: Առանց դիմելու նուիրատուութիւն ընելը մեզի ուժ եւ կորով կու տայ: Երկրորդ.երեք պատկեր փոխանցեմ. երեքն ալ պատահեցան անձամբ ինծի հետ:

Առջի գիշեր Անգլիայէն հեռաձայն մը ստացայ: Սուրիահայ հայրենակից մը, որ Սուրիայէն պատերազմի օրերուն, 2014-ին, ապաստանած էր Լիբանան, մինչեւ իր Անգլիա գաղթելու թուղթերուն դասաւորումը անհրաժեշտ էր ոտքի անյետաձգելի գործողութիւն մը ընէր եւ մենք այդ դասաւորումը ըրած էինք օրին: Ներկայիս, վեց տարի ետք, երբ դիմատետրով տեսաւ մեր աշխատանքները, հեռաձայնեց` ըսելու համար,  որ 400 տոլարով պիտի օժանդակէ մեր աշխատանքներուն:

Երախտագիտութեան եւ  շնորհակալութեան պատկեր մը, որ տարիներ առաջ կատարուած բարեգործութեան մը փոխադարձ կեցուածքը կը պարզէ:

Երկրորդ` մայր մը 100.000 լ.ո. նուիրեց. գումարը իր պզտիկներուն գանձանակէն հաւաքուած էր: ԱՖՀԻԼ-ի գրասենեակ ներկայացաւ` իր երախտագիտութիւնը  յայտնելու եւ  մասնակցութիւնը բերելու համար:

Երրորդ.տարեց հայրիկ մը ներկայացաւ եւ իր կողմէ 50.000 լ.ո. նուիրեց, որպէսզի  ուրիշ տարեցի մը օգտակար ըլլայ:

Եւ այսպէս, մեր գաղութը ինքնուրոյն է իր պահուածքով եւ տոկունութեամբ:

Տակաւին չեմ նշեր հարիւրաւոր կամաւոր տղաքն ու ԼՕԽ-ականները, բժիշկները, դեղագործներն ու հիւանդապահները:

Վարձքը կատա՛ր բոլորին:

Տունը մնացէ՛ք. մենք ձեզի կը հասնինք:

Source: Yerakouyn

You are donating to : Greennature Foundation

How much would you like to donate?
$10 $20 $30
Would you like to make regular donations? I would like to make donation(s)
How many times would you like this to recur? (including this payment) *
Name *
Last Name *
Email *
Phone
Address
Additional Note
paypalstripe
Loading...